سبحان الله كنت عاوز اتكلم عن الاضراب قبل الاضراب واكتب كلام كتير بس شاء ربنا انى اتاخر علشان اكتب كمان عن الحاجات اللي حصلت زيادة الفترة اللي فاتت..
كل هذا الكلام رأي الشخصي.. ومن حقى ان اختلف
وأختلف مع الجميع ..
أولاً من حيث الإضراب ..
الإضراب فكرة ممتازة جدا قوية جداً في التغيير .. السلمى
وهنا اختلف مع دكتور ايهاب صاحب مدونة فليعد للدين مجده حيث قال:
أن تقوم جماعة الاخوان بعصيان مدني فهذا لايتفق مع المنهج النبوي في التغيير؟؟
اذا لماذا شارك الاخوان في ثورة 52
أليست الثورة اكثر من العصيان المدنى او الاضراب وليس الاعتصام ؟؟
هل الاعتصامات والاضراب في الجامعات والتى قام بها اعضاء هيئة التدريس ايضا تختلف مع منهج النبوة
كيف وقد قال اكثر من مرة قيادات الاخوان لو الشعب عمل انقلاب احنا هنشارك معاه لكن مش احنا اللي هنبدأ بالثورة والانقلاب
اما بخصوص الاعمال التخريبية فده كلام تانى نتناقش فيه
لكن مش بسببه نجرم الفكرة من الأساس
.
.
أكمل الاضراب فكرة ممتازة جدا وخطوة لازم تحصل لكن وقتها كان لسه مجاش هكذا أرى..
أولا لأن كما كنت متوقع لن يشارك في الاضراب الا نسبه ضعيفه جدا من الشعب لأن للاسف احنا شعب جبان
علشان يومها اللي هيغيب من الشغل هيتحول ملفه لامن الدولة
خلواااا السبعين مليون يغيبوا ويحولوا ملفات السبعين مليون لامن الدولة
بلا جبن
رد فعل الحكومة والرعب اللي عملته للشعب يوم الاضراب وكمية الاعمال الاعلامية اللي زرعت بيها الرعب جوه الشعب كانت غلطة من اللي دعوا للإضراب
الاضراب كان لازم يحصل بس لما الشعب يهيج اكتر ..
يعنى انا قلت مثال أن دلوقتى 10% من المصالح الحكومية عملت اضرابات .. كنا نستنى لما يوصل الوضع لـ 40 % من المصالح الحكوميية تعمل اضراب
ساعتها هيكون اتعود على الاضراب شريحة عريضه من الشعب وكسر عنده حاجز الخوف وبقه عنده استعداد يعمل اضراب تانى وتالت
ساعتها لما نقول يا اضراب الشعب كله يقف وقفه رجالة .. مش زي الاضراب اللي فاتت
لكن اللي حصل ان عمال المحله كانوا خدوا القرار خلاص .. مش كان ينفع نسيبهم لوحدهم ولازم الكل يقف معاهم ويشاركهم
وهنا اختلف تانى مع دكتور ايهاب في ..
إن هؤلاء المناضلين يريدون النضال بآخر قطرة دم من دماء الاخوان لا دماؤهم هم !!
بتفكرنى الجملة دي مع كلمة ماما الشعب العربي مستعد يحارب اسرائيل لحد اخر جندى مصري
طول ما احنا بنفكر بطريقه مصري وفلسطينى .. اخوانى وليباري يبقى كل سنة وانتوا طيبين علشان نعمل حاجة يبقى كمان 200 سنه في عهد حفيد حفيد الريس الكبير
كلنا من البلد دي اللي هيه مصر واللي يتحرك اكتر ويتحرك الاول هو اللي بيحب البلد دي اكتر ومستعد يضحى علشانها
.
.
موقف حركة كفاية .. كان يجب الا تعلن عن الاعتصامات .. الموضوع مش كان محتاج اكتر من اضراب اعتصامات دي كبيرة شوية
الاخوان ..
رد الفعل الاول كان الاكثر تناسبا مع وضعهم وظروفهم الخاصه والذي كان فيه بيان المرشد متميزا جدا جدا
لم يقل نحن مع الاضراب ولم يقل نحن ضد الاضراب
قال
أن يكون الشعب بكل فئاته وشرائحه إيجابيًّا تجاه هموم وشئون بلده، وأن يترك سلبيته ولا مبالاته
إن الإضراب حق دستوري تكفله أحكام محكمة النقض وتؤكِّده الاتفاقيات الدولية التي وقَّعت عليها مصر
نحن مع الإضراب كوسيلة تعبير واحتجاج سلمي في مواجهة ممارسات السلطة
والله كلام عشرة على عشرة
ويشكر المرشد على البيان الرائع ده
وااضح من كلامه من الاخر ان الاضراب ده لازم يكون اضراب شعبي مش الاخوان اللي عاملينه ولا كفايه لكن الشعب كله والاخوان جزء من الشعب واللي عاوز يشارك يشارك واللي مش عاوز هو حر وما فيش تكليف من الاخوان بالمشاركة بس ده ملخص الكلام
الاعترااااض كله على كلام الدكتور محمود عزت .. عارفين عمال اقول لحد دلوقتى ياريته ما كان طلع واتكلم وصرح
كلام غير منطقى بالمرة
يعنى ايه الكلام ده..
فإن الفكرة لم تُطرَح على الجماعة من الأساس، وإنما سمعنا عن هذا الإضراب من جهاتٍ مختلفة، وكل الدعوات التي وُجِّهت إلى الجماعة لم نعرفها إلا عن طريق وسائل الإعلام
هو احنا وصلنا بالغرور اننا كبار اوى ومش ينفع اننا نشارك في حاجة في مصلحة البلد الا لما الناس يجوا لنا رسميا ويعملوا رسوم الطاعه ويبوسوا الايادي علشان نشارك معاهم
المسألة مش محتاجة تنسيق
ده اضراب يعنى محدش هيشتغل ومحدش هيروح الشغل
مش عصيان مدنى
العصيان بتاع كفايه ده كلام تانى انا مش موافق عليه بالمرة
للاسف كلام الدكتور محمود خلى كتير من الاخوان اللي كانوا هيشاركوا في الاضراب تراجعوا وكسلوا وخااافوا كمان
ياريتنا كنا اكتفينا بكلام المرشد وخلاص
لكن دلوقتى بقينا عاملين زي اللي دخل الشعب في مغامرة وبعدين راح مدي الشعب على قفاه وسابه لوحده
:s
.
.
خلص الكلام
احب افكركم براجل كلنا بننساه راجل دايما بيعمل كل حاجة لوحده راجل فريد من نوعه
بيتظاهر لوحده
بيعمل مؤتمرات لوحده
تلاقيه واقف على سلم نقابه الصحفين لوحده بالميجافون وعامل مظاهرة لوحده
راجل والده من كبار الكتاب ووالدته صاحبه اكبر واقدم مجلة في مصر
الاستاذ محمد عبدالقدوس
ابن احسان عبدالقدوس وروزاليوسف
الراجل ده اعتقلوه يوم الاضراب ياترى طلع ولا لسه
??
12 Comments:
أخي الحبيب:
من حقك طبعا الاختلاف.. ولكن!
لابد من الاتفاق على توصيف واحد حول ما نتناقش عنه وإلا أصبح كحوار الطرشان
وأرجوك الإجابة عن هذه الأسئلة بوضوح:
- ماهو توصيف الدعوة التي وجهت يوم 6 إبريل؟ البعض كان يتحدث عن عدم الذهاب للعمل والبعض الآخر يتحدث عن وقفات احتجاجية وآخرين عن مظاهرات وبعضهم عن "عصيان مدني"!! فأي من هذه الأشياء المتضادة كنت تريد أن يفعله الأخوان؟
- ما هي الخطوة التالية بعد نجاح "....." هذا الذي لا أستطيع وصفه بالتحديد يوم 6 إبريل؟
- كيف تريد أن تتحمل جماعة مثل جماعة الإخوان (وهي تتحمل دائما!!)(أحداث عرض طلاب الأزهر كمثال) مسئولية تحرك غير محدد وغير محسوب وغير معلوم ما بعده؟؟ إنها أشبه بقفزة فى الهواء!!
- كيف يمكنك أن تقارن أشياء مثل (الثورة - الإنقلاب - العصيان المدني- الإضراب - الوقفات الاحتجاجية - الإعتصامات ....)وهي مختلفة كل الاختلاف وتتعامل معها على أنها شيء واحد!!؟؟
أخي الحبيب أدعوك لقراءة رأي الأخ مصعب رجب على مدونته http://kobbaya.blogspot.com/ والتي يقول فيها:
لن أشارك في إضراب 6 أبريل
لهذه الأسباب :
أولا : انا لا أعلم حتى الآن ما هي مطالب هذا الإضراب .
ثانيا : أنا لا أعلم من هم أصحاب هذا الإضراب غير عمال المحلة الذين هم في النهاية فئة معينة من الناس .
ثالثا : لن أشارك لأن التغيير المفاجئ هو تغيير في الشكل وليس المضمون وهذا الإضراب ( رغم أنني لن أشارك فيه :) ) إلا انه ربما ينجح بالفعل في إزعاج الحكومة وربما إسقاطها ولكن لن يأتي الخير بعد ذلك بل إن القادم حينها سيكون أسوء لأنه قادم ليسد جوع البطون وليس جوع العقول والأفهام .
وكذلك الأخت خديجة عبد الله على المدونة:
http://khadega2000.blogspot.com/2008/04/6.html
فضلا عن بعض التناقضات والأشياء الأخرى التى ذكرتها فى ما نشرت والتى أفضل أن أتحدث إليك مباشرة عنها فى أقرب فرصة
وجزاكم الله خيرا
ساعات تكتبوا حاجات تخلى قلب الواحد
يفرح بيكم وفعلا اقول من قلبى إنكم
كبار وأد المسؤلية وساعات.....بلاش
أكمل علشان أنا اللى هأزعل
ربنا يهدينا جميعا لما يحب ويرضى
- ماهو توصيف الدعوة التي وجهت يوم 6 إبريل؟ البعض كان يتحدث عن عدم الذهاب للعمل والبعض الآخر يتحدث عن وقفات احتجاجية وآخرين عن مظاهرات وبعضهم عن "عصيان مدني"!! فأي من هذه الأشياء المتضادة كنت تريد أن يفعله الأخوان؟
توصيف الدعوه لمن حضر مؤتمر القاهرة السادس كان واضح جدا جدا ذكرت في اكتر من ندوة .. ندوة منهم كان فيها الدكتور عصام العريان وجورج اسحاق وقادة احزاب اخرى.
الدعوه اطلقها عمال المحلة للاضراب عن العمل ووقف الحياة العامة في مصر ليوم واحد .. لقرص ودن الحكومة وتهيئة الشعب لأحداث يجب أن تحدث الفترة القادمة .. والضغط من اجل غلاء الاسعار واسقاط الحكومة.
تضامن معها الحركات السياسية والأحزاب وبعض الهيئات..
وتبقى رأي الجماعه لم يعلن..
حركة كفاية أعلنت عن عزمها الاعتصام في الميادين في اليوم ده ودعت الشعب للنزول الى الشارع وتحويل الاضراب لعصيان مدنى ليوم واحد.
وطبعا ده خرف .. انا قلت انى مش موافق على العصيان .. انا مواقف على الاضراب بس.
احنا لما جينا نعلن رأينا في الإضراب .. المرشد أعلن بيان كتير من الاخوان حسوا فيه بسلبية .. لكن انا كنت شايفه لعبة سياسة حكيمة جداا .. تشبه موقف حماس من عملية القدس .. لان الجماعه لديها 1000 معتقل واربعين من القاده يحاكموا عسكريا ومش ناقصه نلاقي حاجة تولع الحكومة علينا كفاية المحليات..
فعاوزين نقول هنشارك بس مش عاوزين.
فكان البيان اللي قاله المرشد انسب تصرف .. يطرح التساؤلات اللي يطرحها الاعلام عن عدم وضوح موقف الجماعه .... هو الوضع ده كان لازم يكون فيه موقف الجماعه غير واضح ومش ينفع يكون واضح.
أما التنسيق والحجج اللي كل شوية حد يقولها والله عدم نزول الناس من بيتها مش محتاج تنسيق وتنظيم ولجنة نظام ولجنة ردع ..
انا قلت انى مش مواقف على العصيان المدنى اللي في الشارع.
.................................
- ما هي الخطوة التالية بعد نجاح "....." هذا الذي لا أستطيع وصفه بالتحديد يوم 6 إبريل؟
- كيف تريد أن تتحمل جماعة مثل جماعة الإخوان (وهي تتحمل دائما!!)(أحداث عرض طلاب الأزهر كمثال) مسئولية تحرك غير محدد وغير محسوب وغير معلوم ما بعده؟؟
إنها أشبه بقفزة فى الهواء!!
أنا قلت برضه انى مش عاوز الجماعه تعلن تبنيها للاضراب او انها هتشارك .. لكن في نفس الوقت مش تعلن رفضها للاضراب وتترك القرار لأفراد الشعب وبكون اضراب غير مرتبط بتنظيمات ... وواضح اوى في السؤال ده ان حضرتك مختلفه من اساسه مع بيان المرشد.
اللي واضح فيه التأييد القوى لخطوة الإضراب >> البيان
http://www.ikhwanonline.com/Article.asp?ArtID=36040&SecID=212
ما ينعش يبقى اللي عامل الاضراب ده حركة كفاية ولا ينفع يكون اللي عامله جماعه الاخوان او حزب من الاحزاب..
ده لازم يكون اضراب شعبي بعيد عن اي احزاب او تيارات زي اضرابات عمال المحلة اللي حققت انجازات رهيبه بدون ما يكونوا برئاسه اي جهه او حزب او تنظيم .. لكن ده العمال عاملين اضراب .. زي برده الشعب عامل اضراب.
- كيف يمكنك أن تقارن أشياء مثل (الثورة - الإنقلاب - العصيان المدني- الإضراب - الوقفات الاحتجاجية - الإعتصامات ....)وهي مختلفة كل الاختلاف وتتعامل معها على أنها شيء واحد!!؟؟
اما الاضراب فهو نفس ما قام به اعضاء هيئة التدريس الا انهم زادوا عليه بوقفه احتجاجية
العصيان المدنى ده حاجة كبيرة شوية وقتها لسه مش جه بس لازم تحصل ولازم يكون فيها تنسيق قوى جدااااا علشان مش يحصل فوضى
الثورة دي اكبر من الاتنين .. الانقلاب احنا مش عندنا جيش علشان نعمل انقلاب والوقفات الاحتجاجية دي مجرد اعلان راي بصوت عالي ..
لن أشارك في إضراب 6 أبريل
لهذه الأسباب :
أولا : انا لا أعلم حتى الآن ما هي مطالب هذا الإضراب .
المطالب مش محتاجة حد يوضحها لانها عايشين فيها كلنا ابسطها رغيف العيش والغلاء اكبرها اسقاط الحكومة بلاش اسقاط الرئيس دلوقتى والرسالة كانت واضحة للحكومة اللي حصل بعد الاضراب من انخفاض سعر الرز .
ثانيا : أنا لا أعلم من هم أصحاب هذا الإضراب غير عمال المحلة الذين هم في النهاية فئة معينة من الناس .
عمال المحلة دول في نظري احسن مننا كلنا دول عامة الشعب اللي عملوا حاجة من غير اي توجيه سياسي دول اتحركوا لوحدهم واتحركوا بجد علشان بيحبوا البلد دي واستتحملوا البهدله
ثالثا : لن أشارك لأن التغيير المفاجئ هو تغيير في الشكل وليس المضمون وهذا الإضراب ( رغم أنني لن أشارك فيه :) ) إلا انه ربما ينجح بالفعل في إزعاج الحكومة وربما إسقاطها ولكن لن يأتي الخير بعد ذلك بل إن القادم حينها سيكون أسوء لأنه قادم ليسد جوع البطون وليس جوع العقول والأفهام .
انت مش عاوز تشارك .. فده حريتك بس احب اقولك انك انسان سلبي الكلام لمصعب
وبتفكرنى بسؤالك عن اللي هيحصل بعد كده بتفكرنى بكلام الناس وهما بيقولوا حسنى احسن من غيره احنا مش عارفين مين اللي هيجي بعده علشان كده هنروح نرشحه هو ده اللي بيسموه الخوف من التغيير.. والسلبية
وانا اعتذر جدا ان كان الموضوع دايق حضرتك .. بس والله البلد حالها صعب ومش محتاجة اننا احنا كمان نكون سلبين
مدام اميمة والله انا ما اقصد ادايق حضرتك او ادايق اي حد بس احيانا بيكون فيه مواقف .. ما كنش ليها لازمة تحصل ولازم نقيم في النهاية اللي حصل ونشوف اللي عملناه صح وايه اللي عملناه غلط
"لكن وقتها كان لسه مجاش هكذا أرى.."
أتفق معك في هذه ..
---
واسمحلي أنقل لك رد كتبته في مدونة آبي ، اختصارا للوقت ، لكن قبل ما أرد ، عايز بس أقول لك :
كلام الدكتور محمود ليوضح لماذا لا تشترك الجماعة - كجماعة أي كرأي رسمي ومرشد ومكتب إرشاد وخلافه وعمل منظم - في الإضراب ، لا ليوضح لماذا لا يشترك الإخوان كأفراد ..
فالأصل أن الدعوة مفتوحة للإخوان كأفراد ليشتركوا .
---
ها هو الرد :
لا أفهم لماذا نضيق واسعا ؟
عقول الناس مختلفة ، وهو ما استدعى أن تكون أفهامهم ونظرتهم للمواقف مختلفة ، وبالتالي تعددت أحزابهم وجماعاتهم
ولو أن كل الناس يفهمون الأمور بنفس الطريقة ، لكنا في الجنة
إذن هناك متسع لرؤية المواقف بمناظير مختلفة
والغريب حقا أن ننكر على الآخر وجهة نظره ، ونسلم أن وجهة نظرنا هي الصواب ولا صواب بعده - ولست أتحدث عنك تحديدا بل عن وجهة نظر عامة من موقف الإخوان من إضراب 6 أبريل
---
دعينا نسأل بضعة أسألة قبلا :
- ايه هي مظاهر ثقة الناس في الإخوان اللي ترين إنهم خانوها ؟
كام من الناس بيمشي معاهم في المظاهرات ؟ وكام من الناس اتحمل الاعتقال ؟ وكام من الناس هيتحمل يقف ينضرب معاهم من الأمن المركزي ؟ وكام من الناس نزل الانتخابات ينتخبهم ؟
وأنا هنا بأسأل على نسبة من الشعب كله فعلا ، مش النخبة المثقفة اللي فاهمة ، ولا حركات المعارضة الأخرى
أقصد أسأل يعني : كام من الناس عنده درجة الفهم اللي تمكنه إنه يتحمل تبعات المعارضة ؟
قد تكون الثقة موجودة في القلوب ، لكن قلت مظاهرها على الجوارح
وقد تكون معارضتهم موجودة في صدورهم أو على ألسنتهم ، لكنها قل أن تخرج إلى الحياة
كام من الناس - كل شعب مصر - مخافش من تهديدات العادلي وكان عنده استعداد يموت في الشارع عشان حقه ؟
وخدي بالك إن احنا هنا كنا بنتكلم على إضراب عام يشمل كل شعب مصر .. ويشمل كل فئات مصر
---
من هنا ..
الإخوان شاركوا في الإضراب !
لكن كأفراد ، بمجهود فردي
الجماعة ادت المساحة دي من الحرية لأفرادها : اللي اقتنع بالإضراب وعايز يشارك فيه أهلا وسهلا ، واللي مقتنعش أهلا وسهلا برضه
وده اللي بان من كلام المرشد :
"فنحن نؤكد أنَّ كل أخٍ من الإخوان في مهنته وفي فئته لا بد أن يكون إيجابيًّا فيما يخص أهل مهنته؛ ...، وحدَّد المرشد أنه على كلِّ فردٍ من أفرادِ الشعب أن يشارك فيما يتعلَّق به"
يعني إذن الجماعة موافقة على المبدأ
وده اللي اتضح من بيان المرشد وكلام د.محمود عزت
لكن الاختلاف في إنها تمشي - كجماعة - وراء الموضوع
كان معروف طبعا إن الإضراب هيكون شئ رمزي ورسالة للحكومة أكثر منه نتائج تتحقق
ومعروف برضه إن جماعة الإخوان دعوة إسلامية شاملة مستمرة - ده على الأقل كلام رجالها
مينفعش بالتالي إنها تشارك في أي شئ رسميا باسم الجماعة من غير ما يكون كل شئ عنه واضح
لأننا بنتكلم عن دعوة كاملة ، وعن مئات الآلاف من أتباعها
واضح من كلام د.محمود إن فيه تشجيع للإضراب ، لكن الجماعة نفسها وقيادتها الرسمية مشاركتش في التخطيط للإضراب ولا تعرف عنه أكتر ما أنا وانتي مثلا نعرف عنه
وبالتالي مش منطقي خالص تزج بالجماعة كلها في موضوع مش واضح لقيادتها نفسهم
هدفه الرئيسي مش واضح
وهتكون مظاهره ايه بالظبط ؟
ومستنيينه يعمل ايه بالظبط ؟
كل ده مش واضح .. خاصة النقطة الأخيرة
ومش منطقي برضه نكون مستنيين الإخوان هما اللي يتحركوا في حاجة مش هما اللي بدأوها أصلا ، وكمان نلومهم على كده بعد ما وضحوا أسبابهم
وده رابط الحوار مع د.محمود :
http://ikhwanonline.com/Article.asp?ArtID=36119&SecID=270
---
اللي قلته ده كله مجرد فهمي أنا للموضوع ، مش كلام رسمي طبعا
والاختلاف في الرأي ؟؟
لأنه نتيجة للاختلاف في الفهم
ولا ..
---
انتهى الرد
---
نقطة أخيرة :
جزئية مصري وفلسطيني .. لا تصلح للمقارنة مع : إخواني وليبرالي
الأولى : جنسية
أما الثانية : عقيدة وفكر
أنت حينما تدافع عن أرض فلسطين ، لا تدافع عنها لأنك مصري أو لأنها أرض فلسطين ، وإنما تدافع عنها لأنك مسلم الفكر والمنهج ولأنها أرض مسلمة ، وهذا هو لب دعوة الإخوان ( مسلم الجنسية )
ومن هنا لو لم يدافع الفلسطينيون عن أرضهم ستظل تدافع أنت عنها
أما في الثانية ..
الاختلاف في المنهج والفكر ..
فتعمل ما اتفقت الأفكار ، وترفض العمل ما اختلف مع ثوابتك وقيمك ومنهجك وهدفك ورسالتك ، وبالتالي : أنت لا تسير وراء الدعوات وإن كانت أهدافها نبيلة إلا حينما تتفق على الوسائل
---
معذرة على الإطالة الشديدة
انت اللي طلبت يا عسل
:)
والله يابنى احييك على فكرك الراقى ده
اللى مش عارف .. ليه بدأ يختفى من الجماعة وظهر مكانه تيار التبريريين
اللى هما بيبرروا للجماعة اى حاجة تعملها وخلاص من غير تعقل حتى فى الكلام
وبعدين مش معقول ان كل الناس قالت ان ده قرار خاطئ تماما وان الحوار مكانش ليه لازمة وطين الدنيا . واحنا برضه مصريين نبرر ان ده قرار صحيح وان كل حاجة كانت ماشية فى السليم !!!!
قال منعرفش اهدافه ولا المنظمين ليه قال
لا حول ولا قوة الا بالله
أنا قرأت الموضوع ولكن لم أقرأالتعليقات.
موضوع الاضراب من رأيى مش سهل وبسيط.دا موضوع شعب عاوز يغير كل حاجة.ثانيا الاخوان جماعة منظمة والجميع يشهد لها بهذا فكيف توافق على الاشتراك فى اضراب(منعرفش عنه اى حاجة), والاخوان لما يكونوا عاوزين يعملوا حاجة بينظروا للموضوع من جميع جوانبه(هيحقق ايه الاضراب, ماذا بعد الاضراب,.......) يعنى دلوقتى اتعمل الاضراب ايه الخطوات اللى بعد كده و لاهو اضراب يوم وخلاص. وعلى فكرة لو الاخوان كانوا شاركوا اى مشكلة مع الامن والحكومة الكل هيسيب الاخوان ويهرب وهيبقى الاخوان فى وجه المدفع.
فى نقطة كمان: ان الاخوان فعلا اكبر فصيل معارضة كيف لم يؤخذ برأيه....الحمد لله احنا عندنا ناس بتفكر وعندها وجهات نظر, يعنى لو كانت المعارضة اخذت رأى الاخوان كنا ممكن ننصح ونقول وجهة نظرنا.
وبعدين فى حاجات الشعب لازم يغيرها فى نفسه قبل ما يفكر يعمل اضراب(الشعب تايه وغاضب) لو الاضراب نجح ايه اللى كان هيحصل؟؟؟؟؟اظن الموضوع هيكون فوضى كبيرة لان الشعب لازم الاول يغير حاجات فى نفسه وبعدين يدور على تغيير الحكومة.
اعتقد رد الاخ خبيب ماشاء الله وفى وكفى كل الكلام اللى ممكن يتقال
واجد فى كلامك اعتراااض على افكار واراء قيادتكم
بس اعتقد اننا فى اى موقف اكيد هما اللى فاهمين الدعوة اكتر مننا واكيد تصرفهم باذن الله هيكون هو الصح
وبعدين بتتكلم على كلام د\محمود عزت كانه قال اللى هيشارك فى لاضراب هيبقى هيعصى الجماعة
لا طبعا
ده بالعكس لو قريت الحوار بتمعن ودقة هتلاقى انه بيتكلم على الجماعة كتنظيم
مش كااافراد
اقترااح بسيط
ممكن انك تناقش الكلام ده مع مسئولك او اى حد من الاخوان اكيد الفهم مش من المدونات
الكل يعرف ان الاخوان فى موقف حرج جدا
من محاكمات عسكرية الى اعتقال ألف
فعدم المشاركة ومش عايزين يشغلوا نفسهم بكل حاجة فى أقصر وقت
وانا بقول حاجة
كلام الدكتور محمود عزت كان رأى وهو فى مكتب الارشاد
وكلام دزعصام فى التلفزيونات كان تانى خالص
وهذا يدل على البيان اللى طلع
اللى كان بين البينين
وده دليل على الشورى ليس الا
أنا اعتقد ان الإضراب ده مهما كان فهو نجاح و تصعيد من جهة ان الشعب اول مرة يسمع الكلمة دي اساسا فكونه يألف سماعها في الأول فده نجاح لوحده
ثانيا انا ضد الإضراب اللي بيقولي اقعد في البيت ... دي اسمها سلبية مش اضراب لأننا بنشجع السلبية في المصريين بالشكل ده اللي هي أصلا مش ناقصه
يعني لما نقول اضراب يبقى معناه اننا نروح الشغل و مانشتغلش و يكون فيه ايجابية مش يقولوا نقعد في البيت لأن اللي خايف من المظاهرات برده قعد في البيت اليوم ده
أنا أعتقد ان الإخوان كسبوا أكتر ما خسروا من عدم المشاركة في الإضراب
لأن الإضراب كان هايفشل في كل الحالات لأن الشعب ماكنش لسه استوعب الكلمة فكون الإخوان ماشاركوش ده مايعتبرش فشلهم بل فشل الداعيين له
وكمان عشان الناس تعرف الفرق بين اضراب الإخوان و اضراب اي جهة تانية و حدوث الاضرار و المصادمات و تعدى المضربين على الممتلكات العامة و الخاصة
و ربنا مع الجميع
الاستاذ العسكري
سلاما وتحية
رجاء إستلام هذه البرقيات السريعة
طبعا من حقك أن تختلف
الاخوان لم يصنعوا ثورة 1952 وأنما علموا بها قبل حدوثها بيوم واحد
اضراب أعضاء هيئات التدريس أو اضراب عمال المحلة حق مشروع لا غبار عليه وربما يكون واجبا لو لم يبق الا القيام به لاسترداد حقا مسلوبا
الذي لا يتفق مع منهاج التغيير النبوي هو تهييج العوام للخروج في الشوارع تحت نداء الجوع
مقولة أحد قياديي االاخوان المذكورة لم أسمع بها واعترض عليها -رجاء تبيان مصدرها للتحقق والمراجعة
الاعمال التخريبية شبه مؤكده لو تكرر الاضراب تحت نفس الظروف
رفع وعي نسبة من الناس من 10% الي 40% كشرط لنجاح التغيير أتفق معك تماما فيه ، لن تتحقق بالاماني وانما باستهداف ذلك من خلال فكر ودعوة وخدمات وتضحيات
كان يجب ان توجه اعتراضك لمنظمي الاضراب عن سبب تحرقهم الشديد لمشاركة الاخوان لا أن تلوم الاخوان علي ذلك، والاخوان عندما يتحركون لمواجهة الطغيان -مثال انتفاضة الدفاع عن القضاة والانتخابات ىالمتوالية لم يلوموا أحدا علي عدم مشاركته ولم يشتموهم باقذع الالفاظ كما يشتم الاخوان الآن لأنهم مؤمنون بأن دمائهم تراق من اجل مباداهم
كلام د. محمود عزت منطقي فليس من العقل أبدا أن تنظم شيئا ثم تطلب من والدك الكريم المشاركة ، كما ليس من الحكمة ان ينطم عشرات الافراد شيئا ثم يطلبون من الاخوان وهم مائة الف أو بزيدون المشاركة، وهذا ليس غرورا وانما ادراكا صحيحا للواقع
ثم انك ألمحت لعشوائية الحدث- و أني للإخوان أن يشاركوا في العشوائيات- عندما قلت ينبغي للاخوان أن يشاركوا في الاضراب لا المظاهرات الخاصة بكفاية التي أوافقك في عدم الاحتفاء بها بالمرة
أحييك علي آرائك الحرةوغيرتك المقدرة، وهكذا الشباب
Post a Comment