شوية تدوينات عجبتني وانا بقلب في المدونات

بقالي كام يوم مش عارف اكتب الموضوع ده... وحاسس انه مالوش لازمة بس فعلا التدوينات دي هيه اللي خلتني اكتب الموضوع ده ..

.......فاصل إعلاني مزنوق في بقي......

بس عاوز اتكلم عن حاجة علطول بفكر فيها وشغلاني اليومين ... حالة شوفتها بتحصل للناس كتير .. "عندما يبدأ الفرد في التحدث عن ذكرياته يكون قد دخل إلى مرحلة من الإحباط وضياع الأهداف" لما الواحد بيدأ يتكلم عن حاجات كانت في حياته جميله كان فيها ناجح فلازم نعرف الإنسان ده بيمر دلوقتي بمرحلة من الإحباط وضياع الأهداف وبيتكلم عن ذكريات علشان يحسس نفسه انه ناجح يعنى مثلا تلاقى واحد بيقولك انا لما كنت في 3 اعدادي كنت الاول على الفصل وكنت وكنت .. ده بيكون في الفترة دي فاشل دراسيا وبيحاول يقنع نفسه انه كان ناجح في يوم من الايام ... والحالة دي شفتها على اربعة من اصحابي الفترة اللي فاتت .. وعاوز اقول ان اللي انتم عملتوه ده وفاكرينه ذكريات جميلة .. انتم ممكن تعملوا احسن منه وطول ما انت قلبك لسه بينبض ولسه بتتنفس ولسه الدم بيجري في عروقك ممكن تعمل حاجات كتير محدش عاملها وممكن تحق احلامك بس أول حاجة هيه انك لازم تخرج من المرحلة اللي انت عايش جواها وتبدأ تخطط لاحلامك من جديد وتبدأ الحركة..

خلص الفاصل نكمل

1 - طبعا أكتر تدوينه عجبتني وأثرت فيا جامد .. لحظات و صور لن أنساها مهما حييت .. بقلم خديجة مالك اللي موجود في مدونة .. انسى فعلا كان موضوع جامد جدا أتأثرت بيه جاااامد جدا ومقدرش اسمك نفسي وعنيه دمعت وانا بقراه

2- التدوينة التانية احذروا أن تكونوا جسرا !! بتاعت محمد شاكر في مدونة حارة سد وكان بيتكلم في موضوع مهم جدا بيقع في شباب كتير من الإخوان وانا منهم .. وده ممكن لان احيانا بيتخيلوا مادوا ان اللي بيعملوه من الدعوة هو اللي شغالين فيه وقتهم فبينسوا حالهم مع ربنا ودي بتكون مصيبة انا غرقان فيها وحاسيتها لما قريت الموضوع ده نفسي كل شباب الإخوان يقروه

3 - التدوينة التالتة just die !!! من مدونة أنا كده لأروى الطويل، أروى مخنوقه علشان في ناس هيه مش تعرفهم ولا عاوزه تعرفهم بيدايقوها وبيأذوها على المدونة وفهيه حلت المشكلة دي بأنها بتتمنى تموت علشان لما تموت محدش هيدايقها ... ولا هيعرف يأذيها وهه بتقول أنها بتتمني الموت لما تكون ما عملتش حاجه وحد بيإذيها

4- التدوينة الرابعة بتاعت أنا أخوان اللي كتبها من جوه المعتقل اولى تدوينات منعم السجنية فعلا تدوينة أثرت فيه جدا ومنعم وحشنا جدا مع اني عمري ما شوفته ولا قابلته ..

5- وعجبتني برضه تدوينة ابن أخ بتاعت عاوزين نكون هدهد اللي قال فيها حته مهمه كنت عاوز اكتبها اللي هيه يعرف أعضاء جماعة الإخوان المسلمين أنها لا تحتكرهم وأنها لو بتشغلهم الصبح عندها ، بتشجعهم ولا تمانع أنهم يشتغلوا بعد الضهر فى جمعية خيرية ، أو فى عمل إعلامى أو فى حركة سياسية أو فى زيارات ومعارف وعلاقات عامة أو فى فرقة فنية أو غنائية أو فى تأليف أدبى أو فكرى أو تدريس علمى أو درس فقهى أو حفظ قرآن أو تحفيظه أو .. أو .. أو ..... إيجابية خارج المؤسسة
لكن وللأسف أنا وأنتم بنكتفى بالشغل بتاع الصبح وننام فى البيت بعد الظهر .

اعتقال واحد من ابطال مصر المرشحين لمجلس الشورى

كان شيء متوقع جدا انه يحصل في الشرقية وفي الدايرة اللي حصل فيها الإخوان في إنتخابات مجلس الشعب على 29500 صوت رغم منع الناس من التصويت وغلق اللجان.. والتزوير طبعاااا

اعتقلوا الدكتور ناجي صقر مرشح الإخوان المسلمين في الدايرة الأولى في الزقازيق بمحافظة الشرقية اثناء أحد جولاته ده طبعا بعد ما فرتكوه هو والـ 12 اللي معاه وضرب الاخ تامر خليل اللي أُصيب بإصاباتٍ خطيرة

قمه المهزلة لما تكون لسه فترة الدعاية مش بدأت والحكومة المخروبة بتقول ديموقراطية وكل مرشح من حقه انه يعمل دعاية ...ويتم إعتقال المرشحين

ده على فكرة غباء منهم لانه في النهاية بتتحول لدعاية عكسية

والناس هتتعاطف معاه هيكسب إن شاء الله غصب عنهم وعن عين ابوهم

المهم حسبنا الله ونعم الوكيل


ده نص الخبر..

ألقت السلطات المصرية القبض مساء اليوم الثلاثاء 29/5/2007 م على مرشح الإخوان المسلمين بالدائرة الأولى بالزقازيق د. ناجي صقر و 11 آخرين من الإخوان المشاركين في الجولة الانتخابية التي كانت بشارع وادي النيل ( أحد أكبر شوارع قسم حسن صالح بمدينة الزقازيق ) .

بدأت جولة الدكتور ناجي و نحو 100 من أنصاره في شارع الحمام وحسن صالح و وادي النيل وكانت ترافقها قوات الأمن منذ بداية الجولة عن بعد ، ولكن فوجئ الإخوان عندما وصلوا مدرسة الأمة بشارع وادي النيل بهجوم شرس من قبل قوة كبيرة من عناصر الأمن والمخبرين بزي مدني بقيادة محمود جمال – رئيس مباحث قسم ثاني بالزقازيق ، استهدف بالدرجة الأولى اختطاف الدكتور ناجي صقر، الأمر الذي دفع الإخوان والأهالي للدفاع عنه ببسالة وحدثت اشتباكات بالأيدي والعصي حتى تمكنت القوات من تفرقة الإخوان الإ القليل الذين بقوا حول الدكتور ناجي وبدأوا بإعتقالهم في سيارة أمن مركزي زرقاء كبيرة واقتيد د. ناجي وحده في سيارة أخرى.

وأكد شهود عيان من المواطنين أن الإخوان كانوا ثابتين لم يتحركوا خوفا من تهديدات الامن مما أثارهم للدفاع عنهم وحمايتهم ، وذكرت مصادر أن عدد من الأهالي ساعدوا الإخوان وحالوا دون اعتقالهم وأخبروهم أنهم على حق ويجب أن نقف معكم .

كما رفض الأستاذ حسن عثمان – مدرس لغة فرنسية وأحد قيادات الإخوان المسلمين بحسن صالح – والمفرج عنه قبل نحو شهر من الآن الابتعاد عن المكان وأصر على البقاء بجوار د. ناجي صقر وعدد من شباب الإخوان.

المحتجزين هم :

1. الدكتور ناجي صقر – مرشح الإخوان بالزقازيق
2. حسن عثمان – مدرس لغة فرنسية ... من اكتر الناس اللي بحبهم
   
3. محمود عبد الرحمن الرصد
4. أبوبكر صلاح عبده ... زميلي في الكلية
   
5. تامر سعيد السيد
6. سيد سعيد السيد
7. ميسرة محمد محمود
8. محمد عطية ....
   
9. محمد محمود بدر
10. علي فؤاد محمد رضوان
11. علي السيد محمود
12. سمير حلاوة

Al Jazeera report about the bloggs of the ikhwan detaines

حرااااااااااااااااااااااااااام يا جدعااان

احنا في بلد ظااالمة .. ده أكيد..

طيب النااااس دي ذنبها ايه ..

ملاييين العمال والمهندسين والموظفين اللي شغالين مع رجال الاعمال دول .. ولا الإقتصاد المصري اللي هيضيع بعد السرقات الحكومية والكوارث اللي كل شوية بتحصل وهروب المستشمرين ... والقضاء على الشركااات وبعد ما قضوا على انتاج الفراخ في مصر والحاجة اللي كنا بنصدرها بقينا بنستوردها بسبب همجية الحكومة في مواجهة مرض اللي كان موجود .. وبعد كده خصخصة الشركات وكمان ضرب رجال الاعمال المحترمين ,,

وفي الاخر البورصة تضيع .. ولما يطلع رئيس الجهاز المركزي للمحاسبات ويفضح .. يفكروا يلغوا الجهاز المركزي للمحاسبات علشان مش يفضحهم لأن الرشاوي اللي بيدوها للجهاز المركزي بيرفض ياخدها ....

طيب سيبونا من إقتصاد البلد وكل الحاجات الخرف دي ... ونعملهم بووووووووووو

الأهالي دول والأطفال دول ذنبهم ايه يا ريت حد يقولي
...

شوفوا الصور في مدونة انسى
http://ensaa.blogspot.com/2007/05/blog-post_3523.html

قبلت المحكمة الإدارية العليا الطعن المقدم من هيئة قضايا الدولة ضد قرار مجلس الدولة بوقف إحالة الإصلاحيين الإخوان إلي القضاء َالعسكري

علشان هما بينموا اقتصاد البلد وبيحاربوا الحرامية وهذا مخالف للدستور

رويتر الإخوان .. عبدالمنعم محمود

,,, يمكن انا اخر مدون يكتب عن إعتقال عبدالمنعم لأن الكثير من المدونين سبقوني وقاموا بالكتابة ونقل تفاصيل الخبر

أكيد ده لأسباب كتيره ..

1- ما كنتش اعرف يعني ايه تدوين ولا يعني ايه مدونات
2- ما كنتش اعرف عبدالمنعم محمود
كل اللي كنت اعرفه عن منعم كنت قاعد انا ومجموعة من صحابي وبنتكلم عن الإعلام وكده فجت سيرت مدونة منعم وسمعت واحد بيقول انه بيقولوا عليه رويتر الإخوان بس ومن ساعتها فضلت الكلمة دي لازقة في دماغي ليه هما مسمينه كده .
3- مش عارف اكتب اقول ايه ومش هحط اعلان او تصميم تضامن وخلاص واقلد باقي المدونين من غير ما اعرف مين منعم ومش بعرف اكون عادي إن أحسن الناس احسنت وإن اساء الناس اسأت لازم يكون ليه فكري ورايي

................

يمكن يكون منعم هو السبب في اني حبيت التدوين من غير ما احس

مش عارف بس كل اللي اعرفه اول ما عرفت ان رويتر الغخوان عامل مدونة بدأت ادور واحاول اعرف يعني ايه مدونة والناس بتعملها ليه طيب ولو انا عملتها هستفاد ايه او هتضرني في ايه ..

عموما بدأت احس بأهمية المدونات وأنك ازاي تقدر تقول اللي انت عاوزه وازاي يكون ليك صوت كل الناس تسمعه وكانت البداية ..
لما كنت في منتدى انا بحبه جدا كان في عضوة اسمه اروى الطويل بدأت تتكلم على المدونات وشرحت ووضحت حاجات كتير كنت مش فاهمها .. وعموما اقتنعت بأني لازم اعمل مدونة .. عملت المدونة وكان اول واحد ضيفته عندي كان منعم ..


اللي خرج من إطار الـ
(underground)
وقالها بصوت عالي "أنا أخوان" وحط صورته واسمه وبدأ يتكلم عن الإخوان بكل صراحة ويحكي ..

فحسيت فعلا اهمية ان الناس تعرفنا من جوه ونشيل الحاجز اللي بينا وبين الناس ونبدأ نتكلم .. وهقول زي ما قال أسد وأنا كمان أخوان

في الاخر اكتشفت ان منعم ده انسان محترم متواضع ثابت على افكاره قوي في هدفه معترف بهويته ومش بينكرها إعلامي ناجح .. ومع ظروف والده وبيته إلا انه مصر على خدمة بلاده وامته حتى لو كان ده هيسبب مشاكل الدنيا كلها فوق


حتى وهو في عربية الترحيلات من على الباب بتاعها برده عمال بيهتف وينادي ضد نظام بلدنا الفاسد حتى وهو معتقل ومع ظروف والده الصعبة .. وكأنه بيقول للحكومة الفاسدة على جثتي ..

ساعتها حسيت فعلا ان منعم فعلا خطر على كرسي الريس وعلى الحكومة ..وأن جسمه الضعيف يقدر يعمل حاجات كتير.

منعم بيهتف

منعم بيشد مع أحد الظباط بعد أن شتمه

عموما انا حاسس ان كلامي ملخبط هتلاقوا الكلام لغة عربية فصحى على عامي وكله في بعضه واسلوب الكلام في الضياع بس ده الكلام اللي كان جوايا وكنت عاوز اخرجه

وده بعد ما عرفت ان منعم واحد من الناس عنده هدف وطموح مش انكر هويته مع انها ممكن تكون سبب في ضرره وهو انه هو اخوان ..

ومنعم يستحق منا الكثير .. واحنا لازم نعمل ربع اللي عمله علشان نوصل رسالته لكل العالم

والفيديو ده عجبني جدا لازم كل الناس تشوفه عن البطل عبدالمنعم محمود رمز اللي اتحول لرمز لكل مدون أو إعلامي مصري