ما الإخوان يقتلوا رئيس الوزراء ويخلصوا البلد

ما الإخوان يقتلوا رئيس الوزراء ويخلصوا البلد

دي كانت أغرب جملة اسمعها في حياتي ... اليومين دول..

أنا بقيت مخنوق من ساعة لما التعديلات اتنيلت واتطبخت ..

وبقيت كل ما اركب تاكسي او اروح حته اتكلم مع الناس عن حال البلد والتعديلات واحاول اوعيهم للي بيحصل...

المهم انا راكب تاكسي ورايح الجامعة فبنتكلم مع السواق على اللي التعديلات الدستورية هتعمله في البلد لقيته بيقولي ماهم (الحكومة) عرفوا يضحكوا على الشعب يا بيه ويلهوهم في لقمة العيش اللي هيجبوها لولادهم ...

ومحدش من الشعب بيفتح بقه وكله ساكت ...

فبقوله بس الإخوان عملوا كذا وكذا ... قالي الإخوان ما عدوش زي زمان ... لو الإخوان كانوا بيحبوا البلد كانوا يقتلوا رئيس الوزراء او وزير كبير ويخلصوا البلد من الحرامية اللي ماسكنها ..

فقلتله بس هما لو عملوا كده هيقولوا عليهم ارهابين والعالم كله يحاربهم .. وبعدين هما بيغيروا الحاكم الفاسد بالنصح والمحاسبة ...والحكمة والموعظة الحسنة ..

قالي يا بيه هما لما يقتلوا واحد خاين يبقوا ارهابين ... يا بيه اللي بيحكمونا دول خونة

المهم انا معرفتش اكمل معاه الكلام لاسباب كتييير اولا اني كنت وصلت الجامعة ثانيا اني استغربت من كلامه .. وتنحت قدامه وبقيت مش عارف ارد ..

المشكلة مش في كده المشكلة ان اسلوب الاغتيالات ده مش هيجيب اي نتيجة بالذات مع وجود جيش في ايد اتباع الحكم .. وأمن الدولة ..

لكن اللي هيجيب نتيجة ان الشعب كله يتحرك ويقف قدام الحرامي اللي بيحكمنا ..

بس امتى يتحرك؟

اللي مستنينه الغاء الدعم من على رغيف العيش وده اللي هيفجر بركان الغضب الشعبي الخامد

السادات
(الشعب كان بيحبه علشان حرر سيناء)
الشعب كله عمل مظاهرات

مبارك
الشعب بيكرهه كره العمى
لو لغى الدعم الشعب هيقتله

سواق تاكسي بسيط مالوش في الطور ولا في الطحين وبيفكر بالطريقة دي ...
الناس وصلت لمرحلة غليان رهيبة ..