نفكر شوية ممكن؟؟

بعض الاسئلة عاوز ردود عليها..

== هل المشكلة الإقتصاديه الموجوده حالياً في البلاد يمكن حلها بسهوله؟؟

== هل غلاء الأسعار يمكن القضاء عليه في لحظات؟

== هل المشكلة مشكلة سياسه اقتصادية "الخطة الاقتصادية التى تضعها الحكومة" .. ام مشكلة مسئولين " وزير الإقتصاد الحالي والحكومة" .. ام الاثنين معا؟

== هل يوجد قوى سياسية في مصر "كالأحزاب او الإخوان او اي تيار سياسي" قادر على تغيير الوضع الاقتصاد الحالي ؟؟ هل سيكون التغيير بعصا سحرية .. ام يوجد لديهم خطط اقتصادية ؟؟ وما هي هذه الخطط؟

== أين أصل مشكلة الغلاء بالاساس ؟؟؟ وما الحل المناسب ؟

== هل الهدف من الاضرابات .. الفوضى الخلاقه كما يقول البعض التى لاتحل القضيه وانما تقذف بنا الى مجاهيل دول العالم الرابع ... ام الى اسقاط الحكومة التى فشلت في المحافظة على توزان الاسعار.. ام ارباك المدعو رئيس البلاد ؟



بعض ملاحاظاتى على الوضع.. علشان اكون قلت رأي:

الوضع الاقتصادى في البلد عنده اسهال .. اولاً ميزان المدفوعات ضااارب "استيرادانا أكتر بكتييير من تصديرنا"... الدين العام "ديون مصر" كبييرررررر .. المسئولين الموجودين في الحكومة نصهم بيجرب خطط اقتصادية بدون دراسه جيده والنص التانى بيسرق .. والحاجات اللي بتفضل من موارد البلد وبتكون مدعومه الشعب بيسرقها وبيـبـعها بسعرها من غير دعم ويحط الفرق في جيبه ( أقصد دقيق المخابز وما شابهه) .. قدرة الحكومة على ضبط الوضع الاقتصادى والتحكم في السوق بقه ضعيف جداا .. بعد الخصخصه .. البلد هتزدهر اقتصاديا ولكن في طبقه من الشعب هتتطحن ..

رأيي أن البلد هتزدهر اقتصاديا ازدهار سريع ولكنه هينهار بسرعه جدا .. لانه هيعتمد بالاساس على الإستثمار الاجنبى المباشر .. واللي عند دخوله للبلاد يحسن من الحالة الاقتصادية للبلاد لكن مع استمراره تعود الامور إلى الاسوء تدريجياً... لانه هيبقى بياخد من البلد اكتر ما بيديها كما انه لاتوجد منافسه تذكر من أي منتج محلي ..

نفكر شوية ممكن ؟؟ وندور على حل ؟

تسلم يا دكتور عبد المنعم ريحتنا

ليس دقيقا أن الإخوان لم يشاركوا في إضراب 6 إبريل، كما أن الكلام عن عدم مشاركة الإخوان في هذا الإضراب بهدف التهدئة غير صحيح، الإخوان ليس من طبيعتهم مثل هذا العمل، الإخوان اختاروا التهدئة والدافع بالدرجة الأولي هو مصلحة الوطن، أما القول بأن الإخوان اختاروا التصعيد أو التهدئة من أجل مصلحة ذاتية فغير صحيح، مع أن هذا ليس عيبا، كما أن الإخوان لم يشاركوا بشكل رسمي في الإضراب لأنه لم يكن هناك ترتيب له، لكنهم أصدروا بيانا دقيقا واضحا جاء فيه أننا مع مبدأ الإضراب، وتركوا الخيار لأفرادهم، فنحن لم نصدر تعليمات كإخوان مسلمين لأفرادنا ألا يشاركوا، ولم نصدر لهم تعليمات بالمشاركة.. والبيان الذي صدر عن الإخوان هو البيان الذي صدر باسم الأستاذ محمد مهدي عاكف فقط، فأنا لست مع أي تصريح صدر عن الإخوان أساء لإضراب 6 إبريل، فليس لك أن تسيء لهذا الإضراب، لك أن تقول أنك لن تشارك فيه وهذا حقك، والدكتور عبد الوهاب المسيري كان عاقلا عندما تحدث عن عدم المشاركة الرسمية للإخوان.

ومن المعروف أن أي تنظيم سياسي يكون له موقف من ثلاثة، أن يحشد أعضاؤه وأفراده لعمل شعبي، أو أن يمنع بوضوح وبصراحة أعضاؤه وأفراده من أي عمل شعبي، أو لا يختار هذا أو ذاك ويترك لأفراده الاختيار.. وللأسف فإن بعضا من الإخوان أنفسهم أو من خارج الإخوان يتصور أن الإخوان مؤممين لصالح الجماعة، وهذا خطأ، فالأخ غير مؤمم لصالح الجماعة، الأخ يشارك في فعاليات جماعة الإخوان المسلمين التي تدعو إليها أو لا يشارك فيها باعتباره فرد في الجماعة، فالأخ العضو في جماعة الإخوان المسلمين في النهاية هو مواطن ومثقف وسياسي وناشط له أن يختار ما يشاء من خيارات، وأحد خياراته أن يشارك مع الجماعة التي هو عضو فيها عندما تطلب منه شيء أو لا يشارك، أنا شخصيا كنت مضرب يوم 6 إبريل.. كنت قاعد في البيت.

هذا ما قاله الدكتور عبدالمنعم ابو الفتوح .. في حوار لموقع عشرينات - اولاد البلد..
http://masr.20at.com/newArticle.php?sid=15267


............

أما بخصوص المحكامات فلم أجد كلام اقوله ... ولكن أعجبنى جدا رد الدكتور عبدالمنعم عندما قال (انتظروا رد الإخوان)

واما ما ورد في ذهنى ساعه معرفه نتيجة المحكامات ..

هو انه اخيرا والحمد لله بعد معركة انتخابيه طاحنه فاز الشاطر خيرت .. على حسنيه الغوله ..بفتره رئاسيه لمده 7 سنوات على رغم من ان الفترة الرئاسيه تكون 6 فقط ولكن دي وسايط ...

ونلتقي ان شاء الله قريبا بعد 7 سنوات في انتخابات رئاسيه جديدة ..

حيث ان دعاء المظلوم مستجاب .. فأرى ان ظلم الاخوان في المحاكمات العسكريه كان ظلم لمصر كلها وليس لهؤلاء الـ 30 رجل .. فياريت نوحد دعاءنا في جوف الليل بأن ينتقم الله من الحاكم الظالم وأن يرينا فيه عجائب قدرته وأن يجعله عبره للحكام من بعده .. وأنه ربنا يريحنا منه وياخده ..

:s

وهذا ما يمسى بالفوضى ولعب العيال

أنا مازلت مصر على ان اضراب 6 ابريل كان يجب ان يشارك فيه الجميع بدون الإعلان عن انتماء جزبي او فئوي وبدون أي جهه تقوده مجرد التزام البيوت هذا اليوم

أما الاضراب القادم فهو ده لعب العيال .. وبكره هنعمل اضراب هبه وبعده اضراب هييييييييه

المسأله مش هيصه هيه البلد مش ناقصه فوضى هيه فوضى اصلا..

ده غير كده هنضيع قوة معنى كلمة اضراب والشعب هيتعود عليه ومش هيستجيب لها

فلما نيجي نتفق على اضراب حقيقي هيكونوا اتعودا ان كل يومين اضراب فعادي

احنا أشبه ما نكون بنلعب مع الحكومة على رقعه شطرنج .. الحكومة مش غبية هيه عارفه هتتصرف ازاي وامتى؟

احنا لازم نخطط ونفكر .. وتبقى كل خطوة بحساب ومش عاوزين الناس تتعود على الاضراب كانها موقف يومي بيحصل كل يوم

يعنى مثال في الجامعه كانت جت فترة كانت كل اسبوع او اسبوعين مظاهرة .. لحد ما الطلبة اتعودوا انهم ممكن يدخلوا في اي وقت الجامعه يلاقوا مظاهرة فمش بقوا يفكروا في اللي عاملين المظاهرة ولا قيمة المظاهرة ولا هيه معموله ليه اصلا لان كل يوم بقه في مظاهرة فافقدنا المظاهرة معناها ..

فياريت مش نفقد الاضربات معناها

..

اما بخصوص الصعيان المدنى او النزول للشارع في مظاهرات واضرابات

يجب ان يكون بتنسيق جيد .. وان يكون تحت قيادات

والا هتتحول مصر لعراق اخرى

بس انا ارفض اضرابات مايو القادمه

ألف حمد لله على سلامتك

نهنيء ونبارك جميعاً ..
عوده الدكتور محمد مرسي إلينا الحمد لله بعد خضوعه لعمليه دقيقه في بريطانيا

اضراب ولا اضطراب في القرار

سبحان الله كنت عاوز اتكلم عن الاضراب قبل الاضراب واكتب كلام كتير بس شاء ربنا انى اتاخر علشان اكتب كمان عن الحاجات اللي حصلت زيادة الفترة اللي فاتت..

كل هذا الكلام رأي الشخصي.. ومن حقى ان اختلف

وأختلف مع الجميع ..

أولاً من حيث الإضراب ..

الإضراب فكرة ممتازة جدا قوية جداً في التغيير .. السلمى

وهنا اختلف مع دكتور ايهاب صاحب مدونة فليعد للدين مجده حيث قال:
أن تقوم جماعة الاخوان بعصيان مدني فهذا لايتفق مع المنهج النبوي في التغيير؟؟

اذا لماذا شارك الاخوان في ثورة 52

أليست الثورة اكثر من العصيان المدنى او الاضراب وليس الاعتصام ؟؟

هل الاعتصامات والاضراب في الجامعات والتى قام بها اعضاء هيئة التدريس ايضا تختلف مع منهج النبوة

كيف وقد قال اكثر من مرة قيادات الاخوان لو الشعب عمل انقلاب احنا هنشارك معاه لكن مش احنا اللي هنبدأ بالثورة والانقلاب

اما بخصوص الاعمال التخريبية فده كلام تانى نتناقش فيه

لكن مش بسببه نجرم الفكرة من الأساس

.
.
أكمل الاضراب فكرة ممتازة جدا وخطوة لازم تحصل لكن وقتها كان لسه مجاش هكذا أرى..

أولا لأن كما كنت متوقع لن يشارك في الاضراب الا نسبه ضعيفه جدا من الشعب لأن للاسف احنا شعب جبان

علشان يومها اللي هيغيب من الشغل هيتحول ملفه لامن الدولة

خلواااا السبعين مليون يغيبوا ويحولوا ملفات السبعين مليون لامن الدولة

بلا جبن

رد فعل الحكومة والرعب اللي عملته للشعب يوم الاضراب وكمية الاعمال الاعلامية اللي زرعت بيها الرعب جوه الشعب كانت غلطة من اللي دعوا للإضراب

الاضراب كان لازم يحصل بس لما الشعب يهيج اكتر ..

يعنى انا قلت مثال أن دلوقتى 10% من المصالح الحكومية عملت اضرابات .. كنا نستنى لما يوصل الوضع لـ 40 % من المصالح الحكوميية تعمل اضراب

ساعتها هيكون اتعود على الاضراب شريحة عريضه من الشعب وكسر عنده حاجز الخوف وبقه عنده استعداد يعمل اضراب تانى وتالت

ساعتها لما نقول يا اضراب الشعب كله يقف وقفه رجالة .. مش زي الاضراب اللي فاتت

لكن اللي حصل ان عمال المحله كانوا خدوا القرار خلاص .. مش كان ينفع نسيبهم لوحدهم ولازم الكل يقف معاهم ويشاركهم

وهنا اختلف تانى مع دكتور ايهاب في ..

إن هؤلاء المناضلين يريدون النضال بآخر قطرة دم من دماء الاخوان لا دماؤهم هم !!

بتفكرنى الجملة دي مع كلمة ماما الشعب العربي مستعد يحارب اسرائيل لحد اخر جندى مصري

طول ما احنا بنفكر بطريقه مصري وفلسطينى .. اخوانى وليباري يبقى كل سنة وانتوا طيبين علشان نعمل حاجة يبقى كمان 200 سنه في عهد حفيد حفيد الريس الكبير

كلنا من البلد دي اللي هيه مصر واللي يتحرك اكتر ويتحرك الاول هو اللي بيحب البلد دي اكتر ومستعد يضحى علشانها
.
.

موقف حركة كفاية .. كان يجب الا تعلن عن الاعتصامات .. الموضوع مش كان محتاج اكتر من اضراب اعتصامات دي كبيرة شوية

الاخوان ..
رد الفعل الاول كان الاكثر تناسبا مع وضعهم وظروفهم الخاصه والذي كان فيه بيان المرشد متميزا جدا جدا

لم يقل نحن مع الاضراب ولم يقل نحن ضد الاضراب

قال

أن يكون الشعب بكل فئاته وشرائحه إيجابيًّا تجاه هموم وشئون بلده، وأن يترك سلبيته ولا مبالاته

إن الإضراب حق دستوري تكفله أحكام محكمة النقض وتؤكِّده الاتفاقيات الدولية التي وقَّعت عليها مصر

نحن مع الإضراب كوسيلة تعبير واحتجاج سلمي في مواجهة ممارسات السلطة

والله كلام عشرة على عشرة
ويشكر المرشد على البيان الرائع ده

وااضح من كلامه من الاخر ان الاضراب ده لازم يكون اضراب شعبي مش الاخوان اللي عاملينه ولا كفايه لكن الشعب كله والاخوان جزء من الشعب واللي عاوز يشارك يشارك واللي مش عاوز هو حر وما فيش تكليف من الاخوان بالمشاركة بس ده ملخص الكلام

الاعترااااض كله على كلام الدكتور محمود عزت .. عارفين عمال اقول لحد دلوقتى ياريته ما كان طلع واتكلم وصرح
كلام غير منطقى بالمرة

يعنى ايه الكلام ده..
فإن الفكرة لم تُطرَح على الجماعة من الأساس، وإنما سمعنا عن هذا الإضراب من جهاتٍ مختلفة، وكل الدعوات التي وُجِّهت إلى الجماعة لم نعرفها إلا عن طريق وسائل الإعلام

هو احنا وصلنا بالغرور اننا كبار اوى ومش ينفع اننا نشارك في حاجة في مصلحة البلد الا لما الناس يجوا لنا رسميا ويعملوا رسوم الطاعه ويبوسوا الايادي علشان نشارك معاهم

المسألة مش محتاجة تنسيق
ده اضراب يعنى محدش هيشتغل ومحدش هيروح الشغل

مش عصيان مدنى
العصيان بتاع كفايه ده كلام تانى انا مش موافق عليه بالمرة

للاسف كلام الدكتور محمود خلى كتير من الاخوان اللي كانوا هيشاركوا في الاضراب تراجعوا وكسلوا وخااافوا كمان

ياريتنا كنا اكتفينا بكلام المرشد وخلاص

لكن دلوقتى بقينا عاملين زي اللي دخل الشعب في مغامرة وبعدين راح مدي الشعب على قفاه وسابه لوحده

:s

.
.

خلص الكلام

احب افكركم براجل كلنا بننساه راجل دايما بيعمل كل حاجة لوحده راجل فريد من نوعه

بيتظاهر لوحده

بيعمل مؤتمرات لوحده

تلاقيه واقف على سلم نقابه الصحفين لوحده بالميجافون وعامل مظاهرة لوحده

راجل والده من كبار الكتاب ووالدته صاحبه اكبر واقدم مجلة في مصر

الاستاذ محمد عبدالقدوس
ابن احسان عبدالقدوس وروزاليوسف



الراجل ده اعتقلوه يوم الاضراب ياترى طلع ولا لسه
??