من زمان وانا صغير كنت بشوف اصحابي وكل واحد منهم والده ووالدته يقولوا لهم لو نجحت السنة دي وجبت مجموع كذا هنجيب لك كذا او هنديك كذا .... فانا كنت بتحايل على بابا دايما يعملي حاجة تحفزني حاجة تخليني اجتهد اكتر واشد حيلي .. فكان مش بيرضى ابدا يوعدني بحاجة ...
لكن لما نجحت في الاعداديه ودخلت الثانوية بابا من غير ما يوعدنى بحاجة جاب لي عجله (دراجه) احسن من اللي كنت بحلم بيها .... مرميه في اوضتي دلوقتى والتراب مغطيها ... هههه
وكمان في الثانوى لما نجحت بابا وماما جابوا لي كمبيوتر برده كان احسن حاجة موجوده ايامها ... اه هو جابه قبل ما النتيجه تظهر .. لو كانت ظهرت قبلها ما كانوش طبعا هيجيبوا لي حاجة ..
بس انا حاسس انه لو كان قالي قبلها كانت هتبقى محفز ليه اكتر انى انجز اكتر واجيب مجموع اعلى ..
قريت كتير عن التحفيز ودرست كمان حاجات عنه في الكليه .. لكن للاسف عمره ما اتعمل معايا..
لكن المره دي لأول مره في حياتى بابا وعدنى بحاجة لو خلصت السنه دي هيحققها لي .. وهيه حاجة من اهم الاحلام في حياتى .. انا خلاص اخر سنه يعنى كلها 4 شهور او 5 .. واخلص..
بجد انا فرحان اوى بالوعد اللي بابا وعده ليه ... وده اكيد نتيجة دعائي الكتير لربنا ... يارب اخلص السنة دي واخلص بقه علشان احقق حلمى ده ادعووووولي
شكرااااا لكل الناس اللي كانوا بيدعولى قبل كده بجد جزاااااااااااكم الله خيرا ...
كملوا جمايلكم بقه وادعولى ... كمان وكمان وكمان ... علشان مش يحصل اي حاجة وتبوظ الحلم
D:
