أحلى تلات أيام في حياتي

أحلى تلات أيام في حياتي

مؤتمر القاهرة السادس ضد الصهيونية والإمبريالية

ومنتدى الثقافه العربي

الأول بس كنت هشارك في المؤتمر ببعض أعمالي بس للأسف كالعاده

خلص الشغل متأخر قبل ما يبدأ المؤتمر بكام ساعه ومش لحقنا نطبعهم واتلغوا

ودي كانت البدايه

.
.
.

الجميل بقه .. عارفين لما تكونوا بتعملوا حاجة متعبه جدا ومرههقه جدا جدا وبتحبوها

أهو انا بحب واموت في الجو ده

اقصد وسط بتوع كفايه والاشتراكين وحزب الكرامة والغد والعمل والجبهه وصحفين من اغلب الجنسيات ووفود من بلاد كتير وناس من حزب الله وفلسطين

عااااااالم ولا في الخيال .. تخيلوا لما تقعدوا 3 ايام في حاله زهوووول

وكميه من المعلومااات والرهييييبه والندوات السياسية اللي بعشقها وبتفرج عليها بس في التليفزيون لا ده انا بحضر فيها وممكن كمان اشارك في النقاش

.
.

قابلت المرشد وحمدين صباحي وعبدالمنعم محمود وعبدالجليل الشرنوبي

دول قابلتهم وفي اللي سلمت عليهم منهم بس هما ما يعرفونيش

وقابلت ناس تانية برده

محمود سعيد (مدونة ابن اخ)

و شلة ايتـ.. اقصد المخابرات احم ..

وفكرونى باللذي مضى وايام لذيذة انتهت بخناقه وتهزيء على ودنه

وقابلت ابناء الاخوة اللي بيتحاكموا محاكمات عسكرية

ده اول يوم

طبعا كميه الذهول ومنظر النقابه واللوح المعلقه في كل حته والفعاليات والاسلوب الرائع

بس اتغظت اوى اول يوم لانى كان المفرو ض هقوم بدور كبير بس طبعا علشان كان معادى الساعه 2 وانا وصلت 5 كالعاده فمش لقيت ليه شغلت فاتدايقت اوى

لحد ما دخلت قاعه المؤتمر اللي محدش بيعرف يدخلها غير خواص الخواص :P

وصورت جوه

طبعا دخلت بواسطه كبيرة

ساعتها بس حسيت انى يعنى مستريح شوية

ورجعت الزقازيق في المواصلات في نهايه اليوم
وصلت الساعه 2 وسافرت الساعه 7
مش فاكر نمت ولا مش لحقت

.
.
.
.
.

تاني يوم
كان أحلى يوم في المؤتمر

أول يوم كنت زعلان انى مش اشتغلت

تاني يوم بقه

كنت شغال في حتتين في نفس الوقت

طبعا قصرت في واحده منهم بس حاوليت اديهم حقهم في اليوم التالت

بس بجد راحوا جيبين لي لاب توب وقالوالي اقعد اشتغل واقعد اشتغل طول اليوم لحد ما زهقت واليوم قرب يخلص رحت رايح حضرت ندوتين علشان احس انى استفدت حاجة وعرض فيديو لحزب العمل قساميون في ايام الغضب

ندوه كان ضيفها الدكتور جمال حشمت
وكانت بعنوان وسائل ابداعية

والندوة التانية كان فيها الدكتور عصام العريان وجورج اسحاق

طبعا الدكتور عصام كان عيه زحمة رهييييبه بعد ما خلصت احلى ندوه حضرتها في حياتى

فرحت للاستاذ جورج اسحاق وقعدت اتكلم معاه في كام حاجة كنت عاوز اتناقش معاه فيها وحبه وهبت عاصفه من الناس واتلموا حوليه

وقابلت ناس من السودان ولبنان وبريطانيا وفلسطين وحتت كتيييييرر والله ما هعرف اعد او افتكر مين ولا مين

وقابلت عمر الجارحى طبعا قصرت معاه بس انا كنت بعمل ستميت حاجة .. عمر ده مدون وصاحبي من بتاع كده سنتين وكلنا مع بعض فراخ وشوربة (زي عيش وملح كده)

.
.
.

ثالث يوم حضرت ندوااات كتير والله ما فاكرها من كترها اولها واهمها بتاعت الدكتور محمد حبيب والدكتزر اللي كانت موجوده اللي من جامعه القاهرة وحكت عن تجربتها في غزة كانت رائعه وارخم ندوة كانت بتاعت طلاب الدجامعات اللي دمى اتحرق فيها واعصابي تعبت وفي الاخر سبتها ومشيت

.
.
.

يا جماااااعه محمد عادل ( مدونة ميت)
كان معايا كل يوم واجدع واحد قابلته
محمد ده اخوان وكفايه وصحابه كلهم من حزب العمل

وقابلت صاحب مدونة امير القلوب وناس تانية كتير بس مش متذكر الان
.
.
.

ثالث يوم والله ما فاكر انا عملت ايه تانى

عموما اجدع حاجة كان موووول الكشري اللي وجب معانا في ك الايام

.
.
.

عموما انا عشت 3 ايام في احلى عالم انا بحبه عالم كل سياسة في سياسة
وصحفيين واعلاميين

احلى 3 ايام في حياتى



ملحوظة صغيرة انا الجزمة كانت لسه جديده وبهدلت لى رجلي
وكنت عامل حسابى وواخد معايا قطن وشاش وكتشي حاطه في الشنطة علشان لما رجلي تجيب اخر
اللي عاوز يستمتع بالمؤتمر ده يروح على طبيعته ومش يلبس رسمي

وسدادات اذن

انا ان شاء الله مش هضيع مؤتمر زي ده تانى ولازم احضره كل سنة

بتيجي مع الهبل دوبل

تحت عنوان البتاع الي بيجي زمان ده كان اسمه برنامج "صدق او لا تصدق" ..

وممكن نحطه في البرنامج اللي كان بيجي على القناة التانية كل يوم سبت بالليل "حدث بالفعل"

للأسف أول مرة في حياتي اكون خايف من امتحانات زي السنة دي

أول مرة الكمبيوتر يتشال من على السرير وياخدوا الشاشه واقعد لمده شهر من غير كمبيوتر واقضى وقتى في السيبرات أول مرة اركز في المذاكرة - مش اوى يعني هو انا كنت بذاكر كل مادة يومين بس بتركيز شوية - واكون خايف من الامتحانات .. عمري قبل كده ما خفت من الامتحانات ..

بقالي اربع سنين في الكلية وكنت بعتبر الامتحانات دي زي اي حاجة في حياة الواحد حاجة وبتخلص

أول مره اكون خايف من النتيجة واروح مخصوص الجامعه علشان اشوف انا عملت ايه دايما كنت بستنى لحد لما حد يجبهالي ولو مش حد جابها بعدها باسبوع اروح اشوفها الاقيها اتقطعت اروح اجيبها من شئون الطلبة

كان عندي يقين بانى التيرم ده هشيل ماده على الاقل 3 مواد على الاكثر << باب الإحتمالات الفصل التانى من الإحصاء صفحه 12

كنت كل ما حد يسألنى على النتيجة اقوله انى هعيد السنة دي


أبشركم جميعا .. بأن ده او تيرم ليه في الكلية انجح فيه من غير ما اشيل ولا مادة

وده اول تيرم اجيب فيه تقديرات في المواد اعلى من مقبول - مافيش غير وانا في اولى كلية جبت في الحاسب الالى جيد - ..

يعنى جبت التيرم ده في ماده جيد جدا وماده جيد

تقدير جيد جدا ده اول مره اجربه ياااااجمااااااعه

انا نجحححححححححت

انا نجحححححححححت

انا نجحححححححححت

انا نجحححححححححت

والله العظيم نجحت

الحمد لله

الحمد لله وكمان من غير ما اشيل ولا ماده

وجايب تقديرات في المواد

انا عارف انه ده بدعاء بابا وماما وناس تانية :) ..

بس انا كنت بذاكر بتركيز اوى حسيت ايامها انى طالب في الجامعه

بجد أشكر كل اللي ساعدونى في المذاكرة وأخص بالذكر .. صمت .. اللي كنت بذاكر عنده في البيت وناكل وننام

ومحمد عبدالعاطي صاحبي مش تعرفوه كنت برده بروح اذاكر معاه

وشكر كبييييير لابن عمى اللي جه وشال شاشه الكمبيوتر من بين ايديه واتخانقت معاه ساعتها .. المشكلة انه شال الشاشه وانا بلعب كونكر وكنت خلاص هخلص الليفل

واشكر بابا وماما وكل اللي ساعدونى وشجعونى ودعولي أشكركم جميييييييييعاً

معلومة صغيرة انا و10 تقريبا من اصحابي عدنا السنة اللي فاتت كلنا وكنا من اكتر من كلية .. يعنى في مثلا 7 من تجارة و2 هندسه وواحد صيدلة السنة دي الحمد لله اغلبنا نجحنا والحمد لله

والفضل كله يرجع لربنا سبحانه وتعالى

************

حاجة تانية ..

واحد كلمنى امبارح على الميل اسمه كمال من المغرب

كمال قعدت اتكلم معاه ففتح لى الكاميرا

كمال ولد عنده 15 سنة لسه في الاعدادي عنده مرض في عينه ..

في جزء في عينه بيموت تدريجيا ده اللي فهمته منه

كمال المفروض انه محتاج يعمل عملية لكن لان الدول العربية دول متخلفه للاسف.. المغرب مش فيها الامكانيات اللي تخليه يقدر يعمل العملية دي

كمال محتاج انه يسافر بره علشان يعمل العملية

كمال قالي انه بيحب فلسطين

وانه بيحب كورة القدم ونفسه يكون احسن لاعب كورة قدم علشان يعمل زي ابو تريكة

وينصر فلسطين وغزة

وكمان علشان يكسب فلوس كتير علشان يقدر يسافر يعمل العملية

كمال طفل صغير بيخسر عينه تدريجيا محتاج اننا كلنا نتضامن معاه ونساعده وندعيله

رقم تليفون كمال في المغرب
050987663
الكود بتاع المغرب تقريب
212

ايميل كمال
kamalito_2008@hotmail.fr

كمال ولد غلبان هتحبوه جداااا بس محتاجين اننا نكلمه ونشجعه ونعرفه انه ممكن يكون حاجة كبيره ..

ممكن بعد ما يتعالج يدرس الطب ويكون هو الدكتور اللي بيعالج الامراض المشابهه للمرض بتاعه ادعوووله

كل ده علشان كمال بيحب فلسطين


************




أنشودة جديدة لمحمد يونس عن المحاكمات العسكرية
http://www.sharkawyonline.com/images/7AKAMET%20FINAL.mp3

:D

جعاااانه يا مصر يا أرض النعم .. يا مهد الحضارة يا تربتتي تي

الشعب قرب ينفجر

والله يا جماااعه حراااام الناس لما تكون مش عارف تشتري رغيف عيش تشتري ايه ( زيت ) :s

كنت سمعت نكته زمان .. هيه مش نكته اوى بس تريقه بتقول:

الشعب المصري ده عامل زي الراجل الغلبان اللي ساكن في الدور الارضي
ماسورة المجاري انفجرت والشقه اتملت ميه
راح جايب طوبه ووقف عليها علشان مش يتبل
فالميه عليت اكتر
راح جايب طوبه كمان
عليت اكتر
جاب كمان واحده
وهكذا لحــــــد ما الميه قربت توصل للسقف ومش بقى ينفع يجب طوب كمان
ساعتها بس فكر يروح يجيب السباك علشان يصلح الماسووورة

تعيش مصر حرة مستقلة .. يسقط الاستقلال
بلدنا بقت بلوظة

اتفرجوا اتفرجوا

شوفوا ده الأول



شوفوا الفيديو التانى

My work in no-more-ignorance

those aren't the end of the bloody stories signed by Israel, Just some picked from here and there...Raised a big Question Mark, Where is the World? Where are the human rights organization? Where is the media to spread the truth about those bloodthirsties in Israel? Where is everyone?

*Israel has been using the heaviest missiles by F-16s. Some experts here estimate that there are one-ton weight of Israeli missiles....

* What happens in Gaza is not an aggression of bombardments by planes, but it is a war of elimination by its full meaning. Babies are being killed, civilians are being killed, and buildings are being destroyed....


Need to reed more?..
Please press Download to get our new PDF project about Gaza, or read it online at Gaza...Oops They did it Again

Here my new design .. Gaza wont die .. In page 22

العودة للحياة

احنا ممكن نقول أن دي إعادة ميلاد للمدونة

لأني مش كنت فاضي فعلا .. وكنت مسافر

وأخر تدوينات كلها منقولة علشان كانت دي حاجات عجبتني مش أكتر

في بلادنا أو أمتنا أنتشر الفساد بطريقه مش معقولة... فيه اللي ظاهر لنا وشايفينه وفيه اللي بيحصل بعيد عن عنينا .

وفي ناس بتنبنى وبتصلح في البلد وفي ناس بتهدم وتخرب.

وأحنا عاوز أمجاد وقوة بلادنا ترجع وتكون الدول العربية والإسلامية دول متقدمة لكن للأسف الناس اللي بيبنوا مش في ايديهم حاجة.

لكن الناس اللي بتهدم في ايدهم كل حاجة .. في ايدهم السلطة والقوة والمال.

والناس اللي بتبني بالتأكيد معاها ربنا وربنا أعظم وأكبر.

لكن بمقايس البشر ..

أن
نسبة البناء < نسبة الفساد

وأننا علشان ربنا يكون معانا لازم نتحرك ونعمل حاجة..

وعلشان نسبة الهدم أكبر كان لازم نفكر في طرق غربية ومختلفه نبنى بيها لأن البناء محتاج مننا مجهود كبييييير ..

الفساد والهدم : البناء من أجل القضاء الفساد + البناء من أجل التقدم

وممكن نقول محتاجين امكانيات خارقة علشان نقدر نقاوم الفساد وكمان نبني وعلشان كده حاولت أعمل فكرة غريبة للمدونة علشان هتكلم في قضايا مختلفه شويتين وهندور مع بعض على حلول ..

وهنفكر بطرق أعدائنا وهندرس مشاكلنا.. ونشوف هما لما كان عندهم المشاكل دي اتعاملوا معاها ازاي؟

هحاول أنى أكون مع باقي المدونين السياسين في أنى أكشف الفساد وأفضحه لكن مش هتكون مهمتى الأولى..

لكن مدونتي هتكون مركزه على شوية حاجات .. تحليلات إقتصادية .. وسياسة .. وأعمال فنية

يارب أقدر أدى المدونة حقها .. ويارب تعجبكم وتكون مختلفه عن باقي المدونات

معلش استحملونى اسلوبي وحش في الكتابة بس هحاول اطوره

وأعتذر جداااااااا عن فترة الإنقطاع اللي فاتت

أنتظرونى في أول موضوع جاي مش هيكون جامد أوى بس هيكون .. يعنى حلو :)