انا مش بحب السياسة .. انا بعشقها

أنا

تقريبا دي أول مرة أتكلم فيها عن نفسي
...
مش هتكلم عن نفسي وانا مين وكده لاني مش ليه مزاج حد يعرف دلوقتي

أنا هتكلم عن حياتي والسياسة

أنا زي أغلب المصريين من أسرة مسلمة مصرية متوسطة

........
متشكل من بلاد كتيييير

مولود في الكويت

نزلنا من الكويت في غزو العراق للكويت

اصل عائلة ابي من ناحية الاب من جزيرة العرب من قبيلة "جرهم" أولى القبائل التى سكنت مكة أيام سيدنا اسماعيل

وننتمى لعائلة الفقى أحد ابناء قبيلة جرهم
وبيقولوا ان عائلة جرهم في الأصل قبل ما تيجي مكة كانوا عايشين في اليمين

يذكر اننا من أبناء سيدنا العباس عم الرسول صلى الله عليه وسلم

جدتي لوالدي من تركيا

وعائلة ماما من ناحية الأم من سوريا
ومن ناحية الأب من مصر

وماما عاشت حياتها في الجزائر وبابا عاش حياته في الكويت

........
عائلة سياسية صميمة

جدي لوالدي كان أحد قيادات حزب الوفد ونائب رئيس حزب الوفد في الشرقية
ومن كبار المستشارين في الكويت

جدي لوالدتى كان احد علماء الأزهر

انا اتولدت سنة 1987
سنة تأسيس حركة المقاومة الإسلامية حماس

أذكر وانا صغير كنت عايش قضايا البسنة والهرسك وسرايفوا

ونتيجة متعلقة في البيت مكتوب عليها
الأقصى الحزين ينادى المسلمين

ماما كانت دايما وانا صغير تحكيلي عن الاقصى وفلسطين وقاعدة فرق تسد

كنت بحب الأطلس قوى واقعد اتفرج على خرايط العالم وعلى حدود الدول واتفرج على خريطة فلسطين واحط خطط عسكرية خيالية لتحرير فلسطين

نشأت وترعرعت في عالم من السياسة

كنت من اغرب الناس كل الناس بتحب تتفرج على الكرتون وأنا بحب اتفرج على الأخبار

حصل حاجات كتير غيرت مسار حياتي

اول مظاهرة حضرتها وانا في 3 ثانوى لما اتوفى الشيخ احمد ياسين

كنت معرفش عنه كتير .. بس اعرف انه قائد حماس في فلسطين وقعيد وعلى كرسي متحرك

الصبح الساعة 8 بفتح التليفزيون لقيت القناة الاولى مشغلة اغنية لمصطفى قمر .. قلبت على النيل للأخبار لقيت خبر في الشريط اللي تحت فضلت مستنى لحد ما جابوا الاخبار وجابوا صور من الخبر .. قعدت اعيط وانا حتى معرفش عنه كتير

وقررت اني لازم اشارك في مظاهرة وقعدت اقول ممكن تكون فين المظاهرة اللي اشارك فيها واحرق علم اسرائيل
فكنت عارف ان الجامعه علطول بتعمل مظاهرات كانت اول مرة انزل الجامعه.. لفيت حوليين سورها ادور ازاي هدخل
ودخلت وشاركت في اول مظاهرة في حياتي وروحت وانا صوتى منبوح وفهمتهم في البيت ان ده شوية برد

اه نسيت اقولكم واحنا اطفال في ابتدائي كنا بنعمل مظاهرات في المدرسة والمدرسيين يجيوا يضربونا بالخرزانات ونروح على الفصل

وكمان في الشارع الجانبي ضد اسرائيل ونجيب ورقة ونرسم عليها علم اسرائيل ونحرقها

طفل ثورجي :)

واتغييرت الاوضاع وكل يوم ويوم يحصل تطورات
هتكلم فيها بعدييين

و يوم ورا يوم السياسة تجري في دمائي حتى اصبحت جزء مني

احم بحب السياسة والإعلام (الفن خصوصا)

علشان كده محدش يحاول يقنعني بأني ما تكلمش في السياسة

لأن اللي هيمشي جمب الحيط العيال **** عليه